தமிழில் முன்னணி இயக்குநர்களில் ஒருவரான செல்வராகவன் சமீபகாலமாக நடிப்பில் கவனம் செலுத்தி வருகிறார். ‘பீஸ்ட்’, ’பகாசூரன்’, ‘சாணிக் காயிதம்’ உள்ளிட்ட படங்களில் முக்கிய கதாபாத்திரங்களில் நடித்திருந்தார். அந்த வரிசையில் தமிழக அரசியலை மையமாகக் கொண்டு உருவாகும் ஒரு புதிய படத்தில் செல்வராகவன் பிரதான கதாபாத்திரத்தில் நடிக்கிறார்.
புதுமுக இயக்குநர் ரெங்கநாதன் இயக்கத்தில் உருவாகும் இப்படத்தில் யோகி பாபு ஒரு முக்கிய கதாபாத்திரத்தில் நடிக்கிறார். மேலும், தெலுங்கு நடிகர் சுனில், மலையாள நடிகர் ஷைன் டாம் சாக்கோ, ராதாரவி மற்றும் வினோதினி உள்ளிட்டோர் இப்படத்தில் நடிக்கின்றனர். இயக்குநர் ராஜீவ் மேனனின் மகள் சரஸ்வதி மேனன் இப்படத்தில் கதாநாயகியாக அறிமுகம் ஆகிறார்.